Faten fazaa ومن الحب ما فشل - فاتن الفازع

بيت ظلام ، ملامح وجهو نرى فيهم ما بين شمعتين قريب يذوبوا ، نرى في الرّعشة متاع الضّو كيفاش تمشي وتقوى والشّمع يقاوم، موزيكا صوفيّة تبخنس وصوتو مكسّر السّكات اللّي ليه مدّة عشّش مابيناتتا ، يحكيلي على تصوّرو للدّنيا ، قاعد يقلّي اللّي على حسب تقديرو ، الوجود بدى من برزخ ، بين موت وحياة ، بين هواء وفضاء ، نمشيوا ونرجعوا ، نتعبوا ونرتاحوا ، هو يحكي وانا ماعادش مركّزة معاه فاش يتحدّث ، ظهرلي يهزّ وينفض آما آنا نموت على هزّانو ونفضانو ونموت على كلّ حاجة فيه . جبدت سيڤارو شعّلهولي ، قربتلو حشيت خشمي في رقبتو ، نحبّها ريحتو ديما بنينة ، جبدت نفس قويّ باش نعبّي بيه رواريّا ، خاطر عارفة اللّي ليلتها آخر ليلة باش نشوفو ، آخر ليلة باش نشمّ ريحتو ، باش نسمع صوتو ، باش ننطق اسمو … تعّبني هالثلاثة السّنين الإخرانين فدّيت من عرسو بالحريّة ، نحبّ ندخّلو لحبسي ، نحبّوا يكون شمسي وبرقي ، مع مدّو نعلّي ومع جزرو نوطّي ، ساكتة وفِي مخّي ألف حكاية ، نحبّ نحلّلوا قلبو ونحطّ لتصويرتي مرايا ، نخاف تهرب بيّا منڤالة الزّمان وما نشبعش بيه ، نحبّ نكون شهرزاد لياليه ، نحبّ نمشي على سراط حبّو ونبنيلو عالم يعتكف فيه ، نسرقو مالدّنيا ونهرب بيه ، ندخل في وسطو ونعشّش فيه ، نغفى في عينيه ، نقرب منّو نسكن ونستلبس عليه .....

سندباد للنشر